Lettre MCMXXV. Au Cardinal Scipion Cobelluzzi

(MINUTE)

Union des esprits au Chapitre des Feuillants. - Une élection unanime; regret qu'éprouve le Saint à ce sujet.

Turin, 21 juin 1622.

Monseigneur Illustrissime,

Puis que je cognoy l'affection particuliere dont le sainct zele de Vostre Seigneurie Illustrissime a tous jours embrassé et procuré les interests et l'advancement de la Congregation des PP. Fueillans, il m'a semblé estre de mon devoir de luy donner advis sur le succez de leur dernier Chapitre general, auquel, comme sçait Vostre Seigneurie Illustrissime, Sa Saincteté m'a donné ordre d'assister en qualité de President.

J'asseure donc Vostre Seigneurie Illustrissime que toutes choses s'y sont passées avec une si estroicte union d'esprit, de paix et de pieté, que ces nobles qualitez n'y pouvoient pas estre desirées en un plus excellent degré : de sorte que je puis dire ma presence y avoir esté tresinutile, n'ayant eu autre exercice pendant cest employ, sinon de gouster en moy-mesme la douceur et la consolation en la veuë de tant de modestie et de tant de vertu. Le General y a esté esleu avec un tres-general consentement de tous, car de trente-cinq suffrages, les trente luy ont esté donnez ; et quand son eslection a esté publiée, l'approbation de tous a esté recogneuë dans la commune allegresse qu'ils ont tesmoignée.

Et pour moy, je ne trouve en tout cecy qu'une chose à redire : c'est qu'il me semble que ce n'est pas un detriment de peu d'importance au public, qu'un personnage d'une condition si eminente et qui a escrit tres-elegamment pour le service de l'Eglise, se trouve neantmoins maintenant occupé ès affaires qu'apporte la charge et la Superiorité qu'on luy a imposée, encore que ceste charge soit sur des personnes religieuses et qui font profession de la perfection monastique. Car il me semble que luy ayant reüssy d'escrire avec l'heur et la grace qu'on remarque es traductions du grec en latin et en françois qu'il a données au public, et en refutant les heresies de ce temps, il pouvoit rendre un plus grand et plus important service à la saincte Eglise en la continuation de cest employ. Toutesfois, puis que la divine Providence l'a ainsi ordonné, il est à esperer qu'elle se veut servir de sa promotion au Generalat pour faire reüssir par ce moyen quelque grand fruict à son Ordre et à la saincte Eglise catholique.

Je baise les mains de Vostre Seigneurie Illustrissime avec une ires-profonde reverence, et souhaitte de Dieu en sa faveur toute sorte de saincte felicité, comme estant,

Monseigneur Illustrissime,

Vostre tres-humble et tres-obeyssant serviteur.,

FRANÇOIS, E. de Geneve.

A Turin, ce 21 juin 1622.