Lettre MCMXXI. Au Cardinal Scipion Caffarelli-Borghese (l6, Note 342)

(MINUTE)

Fonctions épiscopales exercées à Pignerol par l'Evêque de Genève.- Le Chapitre des Feuillants. - Prochain voyage du Supérieur général à Rome.

Turin, 21 juin 1622.

Monseigneur Illustrissime,

Comme j'estoy ces jours passez à Pignerolle pour assister à la celebration du Chapitre general des Peres Fueillans, j'ay esté convié par Vostre Seigneurie Illustrissime, par vostre Vicaire general et encore par Monseigneur le Nonce, qui est en ces quartiers , d'administrer le Sacrement de Confirmation au peuple de ce lieu, dequoy je me suis acquitté pendant les deux jours consecutifs de Dimanche qui se sont rencontrez au temps de la tenuë du Chapitre . J'ay conferé aussi les Ordres mineurs à plusieurs, suivant le desir que monsieur vostre Vicaire general m'a tesmoigné que vous en aviez.

Quant au Chapitre general qui y a esté celebré, je puis dire avec verité que je n'ay jamais veu assemblée plus modeste, plus religieuse, ny où la paix reluisit avec plus d'esclat qu'en celle-là. On y a fait l'eslection d'un General doüé d'une doctrine eminente, d'une prudence rare et d'une singuliere pieté ; et ceste eslection a esté faicte quasi par le concours de tous les suffrages. Je m'asseure, que Vostre Seigneurie Illustrissime aura pour chose fort aggreable de le voir favorablement quand il se rendra à Rome l'automne prochain; parce que c'est un personnage de tres-grand merite, et qui a servy et servira à l'advenir la saincte Eglise par ses doctes escrits, et d'ailleurs, parce qu'ayant esté creé General au Monastere de Vostre Seigneurie Illustrissime, il se promet et attend beaucoup de vostre protection.

Je remercie tres-humblement Vostre Seigneurie Illustrissime de ce qu'Elle a daigné me commander et se servir de moyen ceste petite occasion ; car c'est la plus grande gloire que je pouvois esperer. Je luy baise tres-humblement les mains, et prie Nostre Seigneur qu'il respande sur Elle toute sorte de saincte prosperité, selon la plenitude des desirs,

Monseigneur Illustrissime, de

Vostre tres-humble et tres-obeyssant serviteur,

FRANÇOIS, E. de Geneve.

De Turin, ce 21 juin 1622.