Lettre MCMXXII. Au Cardinal Octave Bandini

(MINUTE)

Une assemblée d'Anges et non d'hommes mortels. - Concours universel de suffrages. - Demande d'une continuation de bienveillance.

Turin, 21 juin 1622.

Monseigneur Illustrissime,

La lettre que Vostre Seigneurie Illustrissime a eu aggreable de m'escrire, du sixiesme de may, m'oblige de mettre la plume à la main pour vous asseurer que le Chapitre general des PP. Fueillans a esté tenu avec tant de paix et un si unanime consentement des esprits et des volontez de ceux qui y ont assiste, que ces braves Religieux me sembloient plustost une as semblee d'Anges, que d'hommes mortels. Il n'a esté veu entr'eux ny discorde, ny dispute, ny la moindre contradiction, mesmement à l'eslection du General, qui a este faicte d'une approbation tres-generale et par le concours quasi de tous les suffrages ; comme certes il estoit tres-convenable, puis qu'ils faisoyent choix d'une personne dont le sçavoir est tres-eminent, la probite exquise et la prudence admirable, et duquel les travaux ont esté tres-heureusement et utilement employez pour la propagation de la saincte foy catholique, comme ses diverses traductions de quelques anciens Peres grecs et quelques traictez qu'il a escrits contre les heresies de ce temps le demonstrent visiblement : de sorte qu'il n'estoit point necessaire que l'authorité Apostolique intervinst en un Chapitre de telle qualité.

Et toutesfois, puis que le commandement de Sa Sainctete l'a ainsi ordonné, j'ay assiste à tous les actes capitulaires qui ont esté faicts, et en rends compte à Vostre Seigneurie Illustrissime ; vous suppliant de toute mon affection, que, comme vous avez tous jours honoré de vostre faveur ceste Congregation, il vous plaise luy continuer la mesme bienvueillance, la mesme protection, à fin qu'elle aille tous jours perseverant et croissant en la saincte observance de la discipline religieuse.

Je baise tres-humblement les mains de Vostre Seigneurie Illustrissime, et prie Dieu qu'il vous comble de ses plus sainctes felicitez, selon l'estenduë des desirs,

Monseigneur Illustrissime, de

Vostre tres-humble et tres-obeyssant serviteur,

FRANÇOIS, E. de Geneve.

De Turin, ce 21 juin 1622.