XII. Petri, papae camerarii, ad Guarinum, abbatem s. Victoris.—Condolet domus ejus gravaminibus.

Venerabili et digne reverendo Patri G., Dei gratia abbati S. Victoris Parisiensis, frater PETRUS, domini papae camerarius, salutem et devotam reverentiam.

Litteras vestras sicut charissimi Patris benigne recepimus, utpote qui honori et obsequio vestro intendere dispositi sumus et parati. Audito autem scandalo vestrae domus condoluimus, et qualiter exinde solliciti fuerimus Deus scit, et opere, quantum rationabiliter potuimus, studuimus demonstrare. Rogamus autem bonitatem vestram quatenus nos capitulo vestro et eorum orationibus commendetis.