Capitulum 10

De infirmitate liberi arbitrii.

INFIRMITATEM quippe liberi arbitrii Apostolus manifestat, dicens : Dominus custodiat corda vestra et intelligentias vestras. Eamdem David orando docet, quum inquit : Inclina cor meum in testimonia tua, et non in avaritiam ; Salomon quoque : Inclinet corda nostra ad se, ut ambulemus in universis viis ejus, et custodiamus mandata ejus et cærimonias ejus. Infirmitatem ejusdem fatetur illa oratio nostra : Pone, Domine, custodiam ori meo, et ostium circumstantiæ labiis meis ; item Propheta : Dominus, inquit, solvit compeditos, Dominus illuminat cæcos ; et rursus, Dirupisti vincula mea, etc. Item Christus apud Joannem : Nemo, inquiens, potest venire ad me, nisi Pater, qui misit me, traxerit eum. Et beatissimus Joannes Baptista asserit : Non potest homo accipere quidquam, nisi fuerit ei datum de cœlo. Unde et Propheta in spiritu clamans : Nisi, ait, Dominus custodierit civitatem, frustra vigilat qui custodit eam ; et Apostolus : Deus est, inquit, qui operatur in vobis et velle et perficere, pro bona voluntate.