III. Pe. S. Chrysogoni, papae capellani, ad Ervisium abbatem s. Victoris.—Ejus ob amorem se pecuniam Roberto de Bristo accommodasse.

Ervisio, Dei gratia venerabili abbati S. Victoris Parisiensis, Fr. PE. S. Chrysogoni, domini papae capellanus, salutem et intimae devotionis affectum.

Petitiones tuas et precum oblationes quas mihi pro amicorum levamine porrigere dignaris, tanto libentius effectui mancipare studeo, quanto arctius charitatis affectu tuae personae adhaereo. Quod in fratris Roberti de Bristo negotio et aliorum noscere vales. Cui tum pro amore tuo, tum debito fraternitatis et avunculi sui duas marcas argenti vel circa accommodavi, quas, me teste, pro negotio suae ecclesiae expendit. Rogo igitur dilectionem tuam, ut tuis hoc litteris praefato abbati notifices, ut super hoc facto sic se habeat, quatenus libentius, si opportunum fuerit, alicui de ordine nostro auxilium ex corde impendam. Ex hoc testes habeo dominum Albanensem et Rogerium clericum ejus, Hugonem capellanum domini papae, et Joannem servientem nostrum quem bene nosti.