XII. Epistola Odonis cardinalis ad Ervisium abbatem s. Victoris.—Commendat ei famulum et negotia ei commissa.

Odo, Dei gratia, S. R. E. dictus cardinalis et apostolicae sedis legatus, dilecto fratri E. abbati S. Victoris, salutem.

Latorem praesentium famulum nostrum, quem pro quibusdam negotiis nostris ad vos transmisimus, dilectioni vestrae commendamus, ut in his quaerendis quae sibi injunximus diligentiam adhibeatis. Volumus enim ut duo bacillia, calicem, thuribulum et reliqua ad capellam, si opportunum invenerit, acquirat et cambium faciat, et rogamus ut eum adjuvetis.