Prologus.

Deus immensus et aeternus, qui loco non capitur, nec tempore mutatur, qui immensa Deitate sua et aeterna cuncta potenter condidit, ipse idem bonitate sua sponsam suam, sanctam videlicet Ecclesiam de culpa et poena misericorditer redemit, et eam de exsilio servatam, et ad beatitudinem supernam sub cursu et mutabilitate temporis praeparatam spiritualibus bonis ditat, et in aliis electis ejus in mundo circumquaque dilatat, et in aliis in coelo beatificat et exaltat. Quam quoque ipse Pater luminum, id est auctor donorum spiritualium, a quo omne datum optimum et omne donum perfectum descendit quotidie, per idoneos ministros Novi Testamenti instituit et regit, et per arctam et arduam viam quae ducit ad vitam, ad coelestia bona ducit. In hac via pedibus sanctae Ecclesiae de valle lacrymarum ad superna gaudia scandentis, lucerna est sermo propheticus, cui ne hujus vitae ignorantia deviet incendit quasi lucernae lucenti in caliginoso loco. In quo prophetia beati Joannis quae in hoc libro continetur, quam ei mediator Dei et hominum homo Christus Jesus ad illuminandam sanctam Ecclesiam revelavit, tanto gloriosior et lucidior enitescit, quanto sublimiora et lucidiora de Christo et Ecclesia oracula describit. In hoc etenim est aliis excellentior prophetiis quod de Christo et Ecclesia magna ex parte sacramenta adimpleta denuntiat, et sicut Evangelium legis observantias, sic ista prophetia excellit veteres a longe respicientes prophetias, quae fere tot habet sacramenta quot habet verba. Et parum dictum est, quia pro merito voluminis omnis laus inferior est. In singulis etenim verbis ejus multiplices latent intelligentiae. Exhortando autem haec Apocalypsis, id est revelatio, sanctam Ecclesiam ad patientiam, multiplices describit tribulationes, pressuras et persecutiones quas in mundo patitur, et praemia superna quae post decursum temporum in coelo consequetur. Primum vero ad declarationem operis consequentis titulum proponit. Deinde salutationem septem Ecclesiarum Asiae, quibus librum istum mittit, adjungit, et sic ad narrationem septem visionum per quas liber idem distinguitur accedit.