Lettre MCCCLXXXI. À la Mère Favre, Supérieure de la Visitation de Lyon

Force des vœux dans l'Institut de la Visitation. - Un procédé que le monde n'approuve pas. - Légitimité de l'expulsion dans les Ordres religieux, et de la prolongation du noviciat. - Douce plainte du saint Fondateur .

Grenoble, décembre 1617 .

Vos vœux, ma tres chere Fille, sont aussi fortz que les vœux de tous Ordres de Religion pour obliger la conscience des Seurs a leur observance. Il est vray neanmoins qu'une fille qui voudra perdre son ame et son honneur se pourra marier apres les vœux, comme feroit la plus grande professe de France si elle se vouloit perdre et se servir de l'Edict de pacification . Le formulaire de vos vœux est fait selon ceux des pareilles Congregations d'Italie, et exprime beaucoup plus la force de l'obligation que ne font la pluspart des formulaires de la Regle de saint Benoist. Le vœu de chasteté est fondamental, selon les anciens Peres , es monasteres des femmes, et les autres ne laissent pas d'estre essentielz.

Il est vray, on peut estre dispensé des vœux simples, et des autres aussi ; plus facilement toutefois de ceux la que de ceux ci, mais non sans grande occasion, et lhors qu'il est expedient : dont les Peres Jesuites se treuvent extremement bien, maintenant en partie le lustre de leur tres illustre Compaignie par ce moyen, lequel le monde n'appreuve pas, mays ouy bien Dieu et l'Eglise. Et toute l'antiquité des Religions a esté comme cela, la solemnité des vœux ayant esté establie despuis peu de centaines d'annees .

L'expulsion a tous-jours esté parmi les anciens Religieux. C'est une chose rigoureuse que pour ne vouloir pas observer le silence on mist une fille dehors. Ce ne seroit pas faute d'observer le silence, mays pour vouloir obstinement troubler et renverser l'ordre et la Congregation, et mespriser le Saint Esprit qui a ordonné le silence es Maysons religieuses. Que si on n'expulse pour l'obstinee desobeyssance et le mespris affecté de l'ordre, je ne sçai pourquoy on expulsera. En fin, les Religieux, mesme les plus solemnelz, expulsent ; au moins voit-on des Religieux expulsés de l'Ordre de Saint François, voire mesme des Capucins ; et les Peres Jesuites, qui sont si avisés et prudens, expulsent pour les desobeyssances, pour peu qu'elles soyent affectionnees et entretenues ( Const. SJ pars 2 ch 2, 4 )

La prolongation du noviciat se faysant pour cause, n'est pas contraire au Concile ( Conc. Trident. Sess XXV, ch 15,16) , comme ont declairé ceux qui ont la charge des declarations d'iceluy, et les docteurs mesmes l'entendent ainsy , De fait, les Carmelines la font selon qu'il semble a propos.

Si ces bons Messieurs eussent autant estudié et pensé pour censurer comme nous avons fait pour establir, nous n'aurions pas tant d'objections. Or, Dieu soit loüé ! J'espere que bien tost chacun s'accoysera par la conclusion qu'on y mettra a Rome .

Ma tres chere Fille, pour Dieu, ayes bon courage ; c'est aussi pour luy que vous vives et travailles. Il soit, a jamais beni et glorifié.

Amen.

FRANÇs. E. de Geneve.

Si ceux qui font cette objection sont gens d'estude, ilz pourront lire Leonard Lessius, Jesuite ( De Just. et Jure 2, 41 De statu religioso dub 14 ), ou ilz treuveront ce qu'il leur faut.