Lettre MDCCCLXII. À Dom Bruno d'Affringues, Général des Chartreux

Conséquence d'une affection qui ne peut être cachée. - Mlle de Bressieu, postulante chartreusine. - Bon espoir du Saint.

Annecy, 13 décembre 1621.

Mon tres Reverend Pere,

Comme cacheroit on le feu ? Je ne puis non plus celer l'extreme affection que j'ay au milieu de mon cœur a vous honnorer de toute ma force; et chacun croid que, reciproquement, j'aye le bonheur d'estre grandement aymé de vostre bonté, et sur cela, comme vous voyes souvent, on recourt a mon intercession es occurrences esquelles on recherche vostre faveur.

Messieurs de Bressieux ont une seur au monastere de Melans qui a grand desir d'y estre Religieuse. Ilz vous supplieront, mon tres Reverend Pere, de les gratifier de vostre authorité, requise pour cela ; et puis qu'ilz le souhaitent, j'implore avec eux vostre charité, ce que je fay d'autant plus volontier, que si je puys prendre connaissance des qualités de cette fille par celles de son aysnee qui est ma belleseur , elle sera vertueuse et bonne servante de Dieu . Et j'allegue cet argument ainsy a la bonne Foy, affin de dire encor une des raysons pour lesquelles je doy cooperer aupres de Vostre Paternité pour le bien et la consolation de cett' ame, puis que mesme je me prometz d'estre advoüé de vostre debonaireté tel que je suis et que l'on me croid,

Mon tres Reverend Pere,

Vostre tres humble et tres affectionné confrere et serviteur,

FRANçs, E. de Geneve.

XIII decembre 1621, Annessi.

Au tres Reverend Pere en N. S.,

Le Pere General de l'Ordre des Chartreux.

Revu sur l'Autographe qui se conservait à la Grande-Chartreuse.