Lettre MDCCCLVIII. À une Religieuse de la Visitation

Humilité et confiance de François de Sales au jour anniversaire de son sacre.- Heureuse navigation sous la protection de la Sainte Vierge.

Annecy, 8 décembre [1619-1621 .]

Hé certes, ma tres chere Fille, si je ne regardois qu'a ma conscience, cette journee me seroit de grande confusion et digne de vos larmes, plustost que de vostre congratulation. Mais Dieu est bon, il void la grandeur de ma charge et la vanité de mes forces ; c'est pourquoy je dis comme saint Ambroyse ( Ep. 21 adAug.Valent. §36 ) : Je

ne crains pas d'une crainte qui oste le courage, par ce que j'ay un bon Maistre.

Ma Fille, aymes moy bien tous-jours avec toutes nos cheres Seurs, et pries la divine Providence de m'estre de plus en plus misericordieuse pour le pardon de mes fautes passees, et de plus en plus propice pour mon amendement a l'advenir. La tres glorieuse Vierge, nostre tres bonteuse Dame et tres pitoyable Mere, nous veuille combler de son saint amour, affin que vous et moy ensemblement, qui avons eu le bonheur d'estre appellés et embarqués sous sa protection et en son nom, fassions saintement nostre navigation en humble pureté et simplicité, affin qu'un jour nous nous treuvions au port de salut qui est le Paradis, pour loüer et benir eternellement son Filz nostre Redempteur. Amen.