Lettre MDCCCLXIX. À M. Pierre Jay

Une " ample " approbation. - Comment il faudrait traiter les choses pieuses et saintes pour détourner habilement les âmes de la lecture des romans. - Hameçon du pêcheur d'hommes. - La délicatesse du monde. - Projet d'un ouvrage.

Annecy, 1620 ou 1621.

Monsieur,

Apres avoir leu vos cayers, je vous les renvoye avec une approbation autant ample que vous la sauries desirer de moy. Mais, mon Dieu, il faut que je vous die que la connoissance que je prens tous les jours de l'humeur du monde me fait souhaitter passionnement que la divine Bonté inspire quelque sien serviteur d'escrire au goust de ce pauvre monde. Je veux dire, Monsieur, que s'il vous plaisoit de suivre vostre pointe et traitter des choses pieuses et saintes d'une façon aggreable, historique et qui charmast un peu la curiosité des espritz du tems, cela les retireroit, ou au moins divertiroit, de la pestilente lecture des Amadis , des romans et de tant d'autres sottises, et ilz avaleroyent insensiblement l'aggreable hameçon qui les retireroit de la mer du peché dans la nacelle de la vertu.

En fin, Monsieur, nous sommes pescheurs, et pescheurs des hommes

( Mt 4,19 ). Nous devons donq employer a cette pesche non seulement des soins, des travaux et des veilles, mais encor des appas, des industries, des amorces, ouy mesme, si je l'ose dire, de saintes ruses. Le monde devient si delicat, que desormais on ne l'osera toucher qu'avec des gans musqués, ni panser ses playes qu'avec des emplastres de civette; mays qu'importe, pourveu que les hommes soyent gueris et qu'en fin ilz soyent sauvés ? Nostre reyne, la charité, fait tout pour ses enfans. Prenes donq courage, Monsieur, suives les mouvemens de ce grand et gratieux genie qui vous anime.

Il faut que je vous confie un secret que je n'ay encor dit qu'a deux de mes bons amis. Croiries vous que, tout pesant que je suis, je fay dessein d'escrire, par une methode de narration historique, les principaux pointz de nostre croyance ? Mays, helas ! si je n'ay point d'autre loysir que celuy que la cour me laisse, je mourray comme les femmes enceintes, sans produire ce que j'ay conceu. . . .

…………………………………………………………………