Lettre MDCCCLXX. À une Dame

Le prix des tribulations. - Bonheur des âmes que Dieu appelle à son service.

[1616-1622 ]

O que Dieu est bon, ma tres chere Fille ! Il est vray qu'il est bon a tous, mays souverainement a ceux qui l'ayment. Les tribulations sont plus pretieuses que l'or et le repos aux ames que Dieu a choysies.

J'escris a nostre Seur Superieure selon vostre desir et celuy de cette chere fille, car je ne puis ni ne dois faire autrement ; elle sera bien heureuse, cette ame, si elle persevere constamment. Meilleure est une heure es portiques de Dieu, que mille et millions es cabinetz des pecheurs ( Ps 83,11 ). Or vous y estes encor, ma tres chere Fille, en ces porches sacrés de Nostre Seigneur, puisque vous pretendes et pretendres invariablement a la conjonction de vostre ame a son Dieu, et qu'elle fait la pluspart de son sejour au mont sacré du Calvaire.

Dieu soit a jamais au milieu de vostre ame, pour l'enflammer de plus en plus de son pur amour, qui est la plus digne et la plus desirable benediction de vostre esprit. Je suis de tout le mien, tres invariablement et parfaitement

Vostre tres humble serviteur,

FRANçs, E. de Geneve.