Lettre MDCCCLXXI. À une Dame

La merveilleuse importunité de la prudence humaine. - Manière de purifier nos intentions. - Deux volontés en l'âme de saint Paul, et en la nôtre. -Agir pour Dieu, afin de lui être agréable, et laisser le reste.

[1618-1622 ]

Je respons a la demande que la bonne Mere de Sainte Marie m'a faite de vostre part, ma tres chere Fille. Quand la prudence humaine se mesle de nos desseins, il est malaysé de la faire taire ; car elle est merveilleusement importune, et se fourre ardamment et hardiment en nos affaires malgré nous.

Que faut il faire la dessus affin que l'intention soit purifiee ? Regardons si nostre dessein peut estre legitime, juste et pieux ; et s'il le peut estre, proposons et deliberons de le faire, non plus pour obeir a la prudence humaine, mais pour, en iceluy, accomplir la volonté de Dieu.

Si nous avons une fille, par exemple, que la prudence humaine dicte devoir estre colloquee en Religion pour quelques raysons de l'estat de nos affaires, or sus, nous dirons en nous mesmes (je ne dis pas devant les hommes, mais devant Dieu) : O Seigneur, je vous veux offrir cette fille, parce que, telle qu'elle est, elle est vostre ; et bien que ma prudence humaine m'incite et incline a cela, si est ce, Seigneur, que si je sçavois que ce ne fust pas aussi vostre bon playsir, malgré ma prudence inferieure je ne le ferais nullement, rejettant en cette action ladite prudence que mon cœur sent, mays a laquelle il desire ne point consentir, et embrassant vostre volonté que mon cœur n'apperçoit pas selon son sentiment, mais a laquelle il consent selon sa resolution.

O ma tres chere Fille, c'est a tout propos que l'esprit humain nous travaille de ses pretentions et se vient importunement ingerer parmi nos affaires. Nous ne sommes pas plus saintz que l'Apostre saint Paul, qui sentoit deux volontés au milieu de son ame : l'une qui vouloit selon le viel homme et la prudence mondaine, et cette cy se faisoit plus sentir ; et l'autre qui vouloit selon l'esprit de Dieu, et celle cy estoit moins sensible, mais laquelle pourtant dominoit, et selon laquelle il vivoit ( Rm 7,21 ); dont d'un costé il s'escrioit : O moy miserable homme, qui me delivrera du cors de cette mort ( Rm 7,24 ) ? et d'autre part il s'escrioit : Je vis, non plus moy mesme, mais Jesus Christ vit en moy ( Ga 2,20 ) .

Et a chaque pas, presque, il nous faut faire la resignation que Nostre Seigneur nous a enseignee : Non ma volonté, mais la vostre, O Pere eternel, soit faite ( Lc 22,42 ). Et cela fait, laisses clabauder la prudence humaine tant qu'elle voudra, car l'œuvre ne sera plus sienne; et vous luy pourres dire comme les Samaritains dirent a la Samaritaine apres qu'ilz eurent oüy Nostre Seigneur :

Ce n'est plus meshuy pour ta parole que nous croyons, mays parce que nous mesmes l'avons veu et entendu ( Jn 4,42 ). Ce ne sera plus pour la prudence mondaine, bien que ce soit elle qui ayt excité la volonté, que vous feres cette resolution, mais parce que vous aves conneu que Dieu l'auroit aggreable : ainsy, par l'infusion de la volonté divine, vous corrigeres la volonté humaine.

Demeures en paix, ma tres chere Fille, et serves bien Dieu en la peyne et fascherie de la grossesse et de l'enfantement, que vous dresseres aussi selon son bon playsir. Et je prie sa souveraine Bonté qu'elle vous comble de benedictions, vous suppliant de m'aymer tous-jours en luy et pour luy, qui m'a, en toute verité, rendu

Vostre tres humble serviteur,

FRANçs, E. de Geneve.