Capitulum 11

Interrogatio, cur dixerit affectum timoris et spei esse imperfectum.¹

GERMANUS: Potenter atque magnifice disseruisti de caritate Dei perfecta; verumtamen illud nos movet, quod dum caritatem tam eminenter laudasti, dixisti timorem Dei et spem retributionis æternæ esse imperfectam, quum Propheta videatur multo aliter sensisse de eis:² Timete (inquiens) Dominum, omnes sancti ejus, quoniam nihil deest timentibus eum. Et rursus fatetur se exercitatum in observandis justificationibus Dei intuitu retributionis, dicendo:³ Inclinavi cor meum ad faciendas justificationes tuas in æternum, propter retributionem. Apostolus quoque ait: Fide Moyses grandis factus negavit se esse filium filiæ Pharaonis, magis eligens affligi cum populo Dei, quam temporalis peccati habere jucunditatem, majores divitias æstimans thesauris Ægyptiorum improperium Christi:⁴ adspiciebat enim in remunerationem. Qualiter ergo timor et spes imperfecta consistunt, quum beatus David glorietur se fecisse justificationem Dei propter retributionem, et præmia futura Moyses adspiciens, dicatur sprevisse adoptionem regiæ dignitatis, ac prætulisse afflictionem durissimam thesauris Ægyptiorum?