Capitulum 1

(Abbatis Chæremonis prima)

DE PERFECTIONE, SIVE DE PERFECTIS.

De oppido Thenneso.

QUANDO eramus in cœnobio Syriæ, et cœpissemus majorem perfectionis gratiam desiderare, succedentibus aliqualiter incrementis post prima fidei rudimenta, proposuimus statim Ægyptum accedere ac remotissimam eremum Thebaidis penetrare, et visitare ibidem plurimos sanctos Patres quorum perfectionem et gloriam diffuderat fama in omni terra, quos volebamus invisere si non studio imitandi, saltem desiderio cognoscendi. Itaque navigatione peracta, pervenimus ad urbem Ægypti Thennesum nomine, cujus habitatores undique includuntur mari aut stagno salis, ita ut dediti ac intenti navigationibus tantum, eo quod terra eis desit, opes substantiamque procurent navali commercio, quia terra non suppetit ædificiis construendis, quum ædificare voluerint, nisi apportetur navigiis de longinquo.