[46]

¹ Communem professionem et Regulam ardentissime zelabatur; et qui circa illam essent zelotes singulari benedictione donavit. ² Hanc enim suis dicebat librum vite (cfr. Sir 24,32; Apoc 3,5), spem salutis (cfr. 1The 5,8), medullam Evangelii, viam perfectionis, clavem paradisi, pactum eterni federis (cfr. Gen 17,13). ³ Hanc volebat haberi ab omnibus, sciri ab omnibus, et ubique in allocutione[m] tedii (cfr. Sap 8,9) et memoriam prestiti iuramenti cum interiori homine (cfr. Rom 7,22; Eph 3,16) fabulari. ⁴ Docuit eam semper in communitionem agende vite portari pre oculis, quodque plus est, cum ipsa debere mori. ⁵ Cuius instituti non immemor, quidam frater laicus, quem inter martyrum numerum credimus esse colendum, palmam assecutus [est] gloriose victorie. ⁶ Nam cum a Sarracenis ad martyrium peteretur, summis manibus Regulam tenens, genibus humiliter incurvatis, socio dixit: ⁷ "De omnibus que contra istam Regulam feci, frater carissime, ante oculos maiestatis (cfr. Is 3,8) et coram te, culpabilem me proclamo". ³ Successit brevi confessioni gladius, quo martyrio vitam finivit, signis et prodigiis (cfr. 2Cor 12,12) postmodum claruit. ⁹ Hic iuvenculus intraverat Ordinem adeo ut ieiunium regulare ferre vix posset, cum tamen loricam ad carnem sic puerulus deferebat. ¹⁰ Felix puer, qui feliciter incepit, ut felicius consummaret (cfr. Sir 18,6).