[39]

¹ Ad servandam humilitatis sancte virtutem, paucis annis elapsis, post suam conversionem, in quodam capitulo, coram omnibus fratribus de Religione, prelationis officium resignavit dicens: ² "Amodo sum mortuus vobis. Sed ecce, inquit, frater Petrus Cathanii, cui ego et vos omnes obediamus". ³ Et inclinans se protinus coram ipso, obedientiam et reverentiam promisit eidem. ⁴ Flebant igitur fratres, et altos extorquebat gemitus dolor, cum videbant se tanto patre quodammodo orphanos fieri. ⁵ Surgens beatus Franciscus, iunctis manibus et oculis in celum erectis, dixit: "Domine, recommendo tibi familiam, quam michi hactenus commisisti. ⁶ Et nunc, propter infirmitates quas tu nosti, dulcissime Domine, curam eius habere (cfr. Luc 10,35) non valens, ipsam recommendo ministris. ⁷ Teneantur in die iudicii coram te, Domine, reddere rationem (cfr. Mat 12,36), si aliquis frater eorum vel negligentia, vel malo exemplo, seu etiam aspera correctione perierit". ⁸ Permansit exinde subditus usque ad mortem, humilius agens quam aliquis aliorum.