[44]

¹ Interrogatus a quodam fratre semel cur fratres omnes, sic a sua cura reiectos, alienis eos tradiderat manibus, quasi ad eum nullatenus pertinerent, respondit: ² "Fili, fratres diligo sicut possum; sed si mea sequerentur vestigia (cfr. 1Pet 2,21), illos utique plus amarem, nec me illis redderem alienum. ³ Nam sunt quidam de numero prelatorum qui eos ad alia trahunt, antiquorum eis proponentes exempla, et parum mea monita reputantes. ⁴ Sed quid agant in fine videbitur". ⁵ Et paulo post cum infirmitate nimia gravaretur, in vehementia spiritus (cfr. Ps 47,8) in lectulo se direxit: "Qui sunt isti, ait, qui Religionem meam et fratrum de meis manibus rapuerunt (cfr. Ioa 10,28)? ⁶ Si ad generale capitulum venero, eis ostendam qualem habeam voluntatem".