Articulus 15
De accidentali præmio Beatorum.
A CCIDENTALE præmium Beatorum in summi Regis palatio, in cœlesti paradiso, est beatitudo et gloria quam habent intueri, martyrumque innumerabilem victoriosum exercitum, confessorum lucidissimam turbam, virginum purissimam collectionem, totiusque cœlestis curiæ præclaram militiam, sapientissimam connexionem, pulcherrimam ordinationem !
Denique, quum unum civem cœlestem in suo decore et gloria cernere, omne gaudium præsentis vitæ transcendat : quam jucundum erit, tam innumerabilem supernorum multitudinem in suo decore et gloria feliciter sine fine inspicere, videre glorificata corpora electorum in tanto splendore, ornatu ac venustate ! In quibus omnibus erit etiam quædam decentissima ac delectabilissima pulchritudo moralis, videlicet ordinatissima omnium membrorum habitudo, dispositio, modestia sive facetia, quæ et in vultibus maxime apparebit. Erunt quippe in illis beatis hominibus venustissimi mores, nec aliquod membrum sine prævio infallibilis rationis judicio unquam movebitur. Ibi erit omnium inviolabilis æterna concordia, mutua complacentia, caritas perfectissima. Eruntque omnia corda voluntati divinæ plenarie ac inavertibiliter conformata, atque in Deo inseparabiliter confirmata.
Tantæ ergo beatitudinis desiderio, et supergloriosi Dei amore, nunc peccatis viriliter resistamus, carnem cum vitiis et concupiscentiis crucifigamus.12 Absit nobis gloriari, nisi in cruce Domini nostri Jesu Christi : per quem nobis crucifixus sit mundus, et nos mundo. Per arctam viam, id est pœnitentialem vitam, infatigabili corde tendamus ad patriam electorum.3 Et super omnia atque præ omnibus Deum filialiter metuamus, ne scilicet eum in aliquo offendamus; eumque pure ac fervide diligamus, primo ac potissime propter puram et immensam ipsius bonitatem, deinde propter beneficia ejus innumera ac promissa cœlestia : qui est super omnia Deus sublimis et benedictus. Amen.
FINIS TRACTATULI DE MUTUA COGNITIONE BEATORUM IN PATRIA.
Footnotes
Chapter 16 of 16