Caput XV - De leprosis et sanguifluis.

146 ¹ Apud Sanctum Severinum iuvenis quidam, Acto nomine, totus leprosus erat. ² Cuius membris existentibus omnibus turgidis et protensis, horrendo aspectu cuncta cernebat ipse. ³ Sic miser in lecto aegritudinis assidue iacens, parentibus suis multam tristitiam ingerebat. ⁴ Quem pater die quadam aggrediens, ut se beato Francisco voveret illi suasit. ⁵ Quo gaudenter consentiente, pater fecit apportari candelae licinium, de quo ipsius longitudine mensurata, singulis annis huius longitudinis candelam beato Francisco iuvenis portare se vovit. ⁶ Qui, voto emisso, illico de loco consurgens, a lepra mundatus est.

147 ¹ Vir alius, nomine Bonushomo, de civitate Fani, paralyticus et leprosus, ad ecclesiam beati Francisci a parentibus deportatus, utriusque morbi plenam consecutus est sanitatem.

148 ¹ Nobilis quaedam mulier, Rogata nomine, in episcopatu Sorano, cum per viginti tres annos fluxum sanguinis passa foret (cfr. Mat 9,20) audiens quemdam puerum Romano sermone canentem miracula, quae Deus per beatum Franciscum fecerat iis diebus, nimio dolore commota, tota prorupit in lacrimas, sicque intra se fide accensa dicere coepit (cfr. Luc 11,38): ² "O beatissime pater Francisce, per quem tanta miracula coruscant, si me digneris ab hac aegritudine liberare! ³ Adhuc tam magnum miraculum non fecisti". ⁴ Nam prae nimio sanguinis fluxu videbatur praedicta mulier saepius exspirare; et si quando fluxus restringebatur, toto corpore tumescebat. ⁵ Quid plura? Paucis elapsis diebus, sentit se beatissimi Francisci meritis liberatam. ⁶ Filium quoque eius, Marium nomine, qui brachium habebat contractum, sanctus Dei solo voto sanavit.

149 ¹ Feminam quamdam de Sicilia, per septennium fluxu sanguinis fatigatam, beatus Franciscus Christi signifer sanam fecit.