Capitulum 12

Cur uno psallente, ceteri in synaxi sedeant; et quali studio post usque ad lucem servent vigilias in cellulis suis.

HUNC sane canonicum numerum psalmorum duodenarium quem prædiximus, cum tali repausatione corporis audiunt, ut præfatas congregationum psalmodias Deique cultum ex more agentes, cuncti super humillima sedilia sedeant, præter eum qui psalmos dicturus surgit et stat in medio, cujus vocem tota cordis attentione advertunt. Sic namque jejuniis atque operibus totius diei ac noctis lassantur, quod prædictum psalmorum numerum usque ad finem audire non valent, nisi hujuscemodi quiete juventur. Nullum etenim tempus absque operis exercitatione vacuum transire permittunt: quia non solum diurnum tempus manibus instanter operando expendunt, sed illa quoque opera mente sollicita inquirunt ac faciunt quæ in densissimis noctis tenebris fieri queunt, credentes se ad contemplationem tanto puriorem pertingere, quanto devotius fuerint circa studium operis ac laboris intenti. Et ideo mediocrem numerum canonicarum orationum putant divinitus institutum, ut spatium quo se infatigabilis cursus virtutis eorum extenderet et levaret, servaretur ardentioribus actibus et