Capitulum 2

Quod cenodoxia pulset monachum non solum in parte carnali, sed etiam spirituali.

NAM vana gloria non solum pulsat monachum in parte carnali seu sensitiva, ut cetera vitia, sed etiam spirituali, ingerens se menti nequitia subtiliori, ita quod hi qui superari non poterant peccatis carnalibus, acrius vulnerentur per vanam gloriam ex spiritualibus suis profectibus ortam. Unde tanto est perniciosior et periculosior ad pugnandum cum ea, quanto obscurior ad cavendum. Omnium namque vitiorum manifestior ac apertior est congressus sive tentatio, et in unoquoque eorum tentator contradictione rigida confutatus, abscedet factus infirmior atque inertior, adversariusque dejectus victorem suum deinceps impotentior attentabit. Porro spiritus vanæ gloriæ quum de peccato carnali tentaverit hominem, et fuerit resistentiæ scuto repulsus, mox tanquam bestia multiformis, priori persona habituque mutatis, conatur sub virtutum specie victorem suum jugulare atque confodere.¹