Capitulum 10

Exemplum regis Oziæ eodem vitio superati.

VIS et aliud ruinæ hujus exemplum accipere? Disce qualiter vanæ gloriæ elatione dejectus sit Ozias atavus Ezechiæ regis præfati, collaudatus in omnibus per Scripturam post ingentia virtutum suarum præconia, plurimosque triumphos quos merito devotionis suæ ac fidei perpetravit: Et egressum est nomen ejus procul, ait Scriptura, eo quod auxiliaretur ei Dominus et corroborasset eum; sed quum roboratus esset, elevatum est cor ejus in interitum suum, et neglexit Dominum Deum suum.