Capitulum 15

De eo quem superveniens senex reperit in cella vanitate cenodoxiæ falli.

MEMINI dum in eremo Scythi habitarem, quod senex quidam gratia visitationis veniens ad cellam Fratris cujusdam, quum ostio propinquasset, et Fratrem illum audisset loquentem, substitit parum foris, volens cognoscere quidnam legeret de Scripturis, vel quid memoriter revolveret operando, ut ibi est moris. Quumque piissimus explorator curiosius auscultaret aure diligentius applicata, reperit eum ita deceptum et occupatum impugnatione spiritus hujus, ut crederet se facere sermonem exhortatorium in ecclesia coram plebe. Quumque subsistens senex audisset eum finisse sermonem, et mutato rursus officio, celebrare velut diaconum catechumenis Missam, tunc tandem senex pulsavit. Egressusque Frater, et solita veneratione senem suscipiens ac introducens, quæsivit ab eo quando venisset, remordente Fratrem conscientia cogitationum suarum, et ne diutius senex stando ad ostium tædium pertulisset. Tunc senex grate joculariterque respondit : Modo veni, quando tu Missam catechumenis celebrabas.