Articulus 3

Scripta Alcorani et testimonia Mahometi de Maria virgine et Joanne Baptista, parentibusque eorum.

QUINTO Alcorani capitulo scriptum est : Adam et Noe ac Abraham illiusque posteritatem et Joachim Deus elegit, et super omnem gentem extulit. Uxor Joachim se gravidam sentiens, ait : Tibi, Deus creator, ventris mei conceptum vovens, ipsum tibi soli servientem devote postulo digneris colligere. Quum autem filiam peperisset, eique nomen Mariam imposuisset, dixit : Natam meam suamque prolem tuo, Deus, obsequio penitus devotas, a tentationibus et insidiis diaboli protege. Hoc matris votum Deus benigne suscipiens, natæ suæ crementum optimum corque firmissimum dedit. Hanc Zacharias in tutelam suam suscipiens, quoties, ut orationes funderet, ad altare processit, fructus optimos intempestivos super eam invenit. Quæ ab eo quæsita unde hos sumeret, inquit : A Deo, qui cui vult, dona facit innumera. Zachariæ deinceps Deum deprecanti ut sibi filium gratum honorificumque tribueret, quum orationes ante altare funderet coram Deo, angeli responderunt : Deus vestræ petitioni satisfaciens, optimoque nuntio te lætificans, filium tibi promittit Joannem, confirmantem verum. Eritque vir bonus, virgo perseverans. Zacharias dixit : Quum sim senex, uxorque mea sterilis, prolem quomodo faciam? Angeli : Deo, inquiunt, nihil est impossibile. Angeli rursus Mariæ dixerunt : O Maria, cunctis viris feminisque præclarior, soli Deo perseveranter studens, ipsum cum humilibus genuaque flectentibus adora. Insuper de hac materia vicesimo octavo Alcorani capitulo multa scribuntur. Sed ista et maxime illa falsis et fabulosis recitationibus, ut infra probabitur, depravantur. De his ergo modo pertranseo, hoc solum adjiciens, quod capitulo Alcorani septuagesimo quarto inducitur Deus dicens : Maria se dirigendo nil malitiæ aut pravitatis operata est : unde nostram animam insufflavimus ei.