Capitulum 6
De imperfectorum instabilitate et mutatione.
SOLENT quippe qui nondum fundati sunt in professione arrepta, quum audierint quosdam in diversis studiis et statibus atque virtutibus commendari, ita eorum exemplis et laude accendi, ut protinus cupiant sequi vocationem ac disciplinam eorum. In quo humana fragilitas impendit cassos conatus, quum impossibile sit unum eumdemque hominem simul fulgere universis donis et actibus jam præfatis. Quos si quis voluerit pariter affectare, necesse est ad hoc devenire, ut dum omnes sequitur, nullum integre consequatur, atque ex hac mutatione capiat detrimentum potius quam profectum. Multis etenim viis ad Deum tenditur: ideo unusquisque irrevocabiliter compleat illam cursus sui intentionem quam semel arripuit, ut sit in qualibet professione perfectus.
Chapter 288 of 499