Capitulum 15

Quæstio, quomodo multi immundi scientiam habeant, et sancti non habeant.

GERMANUS: Hæc tua assertio non videtur veritate fulciri aut probabili rationi inniti. Nempe quum certum sit omnes illos esse immundos qui fidem Christi despiciunt, aut eam hæretica pravitate corrumpunt, quomodo multi Judæi, hæretici, ac vitiosi catholici Scripturam sanctam perfecte intelligunt, et de magnitudine spiritualis scientiæ aut doctrinæ exsultant; et econtra innumera multitudo virorum sanctorum, ab omnibus vitiis purgatorum, simplici fide contenta est, et profundioris scientiæ ignorat arcana? Qualiter ergo stabit illa sententia quæ spiritualem scientiam non nisi cordis tribuit puritati?