Articulus 2

DE EXPOSITIONE SECUNDÆ CLAUSULÆ.

Et eos qui bene egerunt, videamus finaliter deficere.¹ Huic verbo obviare videtur illud Psalmographi: Non vidi justum derelictum. Itemque: Justi autem hereditabunt terram, et inhabitabunt in sæculum sæculi super eam.²³ Illud quoque in Job: Recordare, obsecro, quando recti deleti sunt?⁴ Denique ait et Salvator: Procedent, qui bona egerunt, in vitam æternam.⁵ Quomodo ergo qui bona egerunt, finaliter deficere asseruntur? potissimum protestante de bene agente Psalmista, Quum ceciderit, non collidetur.⁶ Nihilo minus, præinducto verbo consonare videtur illud Isaiæ: Justus perit, et non est qui recogitet in corde suo;⁷ et viri misericordiæ tolluntur, et non est qui intelligat.⁸ Amplius, quosdam ad tempus bene ac meritorie agere, nec perseverare, sed miserabiliter finaliterque deficere, quis ignoret? De quibus et Petrus ait: Melius illis erat non cognoscere viam justitiæ, quam post agnitionem retrorsum reverti.⁹

Itaque clausula ista multipliciter potest intelligi. Primo sic: Eos qui bene egerunt ad tempus, videmus finaliter deficere, id est a cœpto salutis itinere deficiendo, perire et condemnari. Propter quod monet Apostolus: Qui stat, videat ne cadat.¹⁰ Hinc (teste Scriptura) Sapiens in omnibus metuit.¹¹ Et: Beatus homo qui semper est pavidus.¹² Secundo sic: Videmus eos qui bene egerunt perseveranter, finaliter deficere, id est in hac vita usque ad finem adversitatibus affici, ab impiis opprimi, et in persecutionibus mori, quemadmodum Christus suis prædixit discipulis: Trademini a parentibus et cognatis et amicis, et morte afficient ex vobis; et eritis odio omnibus hominibus propter nomen meum.¹³ Tertio sic: Videmus eos qui bene egerunt, finaliter deficere, quia aliquando contingit persecutionem propter justitiam patientes, acerbitati pœnarum succumbere. Quocontra sanctus Job dixit:¹⁴ Donec deficiam, non recedam ab innocentia mea.¹⁵ Hinc Paulus: Obsecro, inquit, ne deficiatis in tribulationibus istis*. Itaque, juxta hunc varium hujus par-ticulæ sensum, diversæ et congruæ, Deo agente, infra dabuntur solutiones ad eam.¹⁶*