Articulus 3
DE SENSIBUS PARTICULÆ TERTIÆ.
MALOS autem videamus sæpe optime mori.1 Huic itidem verbo contrariari videtur illud Psalmi, Mors peccatorum pessima;2 et quod loquitur Christus, Qui vero mala egerunt, procedent in ignem æternum.3 Unde in Job libro asseritur: Vidi iniquos Deo flante perisse.4 Alibi quoque: Deus non porriget manum malignis.5 Attamen, verbo prætacto consonare cernitur illud Apostoli:6 Ubi abundavit iniquitas, abundavit et gratia. Talibus denuo scribens: Fuistis, ait, aliquando tenebræ;7 nunc autem lux in Domino.
Itaque verbum istud, sicut præcedens, varie accipi potest. Primo, de malis in malitia finaliter perseverantibus: qui optime aliquando mori dicuntur, quia in opulentia temporali, et consolatione amicorum ac propinquorum multiplici, atque sæpissime levi quodammodo morte decedunt, quemadmodum in Job libro de im-pio legitur:8 Iste moritur robustus et sanus, dives et felix; viscera ejus plena sunt adipe. Secundo, accipi potest de malis con-versis: qui licet ad tempus sint vitiosi, tamen conversi, dignos agunt pœnitentiæ fructus, et perseverantes in bonis, optime moriuntur.9 Juxta hanc sensus varietatem, ponetur infra proportionata clausulæ hujus solutio.
Footnotes
Chapter 4 of 20