Capitulum 4

Interrogatio senis, unde evenerit nostra anxietas; et responsio nostra.

VENERABILIS itaque Joseph cernens nos corde dejectiores, atque conjiciens hoc non contigisse sine causa, interrogavit nos verbis Joseph patriarchæ : Quid utique tristes sunt vultus vestri hodie ? Cui respondimus, non ut vincti ministri Pharaonis, Somnium vidimus, et non est qui interpretetur; sed diximus : Insomnem duximus noctem, et non est qui relevet onus ac magnitudinem anxietatum nostrarum, nisi Deus tua discretione removerit eas. Tunc ille, qui habebat Patriarchæ virtutem appellatione ac merito, dixit : Nonne a Deo est humanarum afflictionum curatio? Proferte eas in medium; potens est pietas Dei conferre eis medelam nostro consilio juxta vestram fidem.