II. Hoe goet leven beghinnen sal

Ghi sult weten, dat fondament alre heylicheit es puerheit der consciencien. En̄ hier omme seldi u selven proeven en̄ merken van uwen kijntschen daghen; en̄ vindi yet in u, dat ghi ordelt dootsonde, daer af seldi u purgeren vore uwen priester, en̄ vore die ewighe waerheit Gods, met rouwen, met biechten en̄ met ghenoech doene. En̄ dan seldi hopen en̄ ghetrouwen, sonder twivel, der genadicheit Gods, dat u uwe sonden vergheven sijn. En̄ al heeft u God uwe sonden vergeven, nochtan seldi u altoes houden vore sine ontfermherticheit, en̄ met herten en̄ met begherten van binnen roepen: ‘Here, ontferme u mijns, armer sonderssen¹. Ghi selt uwe ghemoede tote hem verheffen met ewighen love, en̄ ghi selt uwe begheerte², metter goetheit Gods, wide uutbreyden tote allen heylighen ende tote allen menschen, met ewigher minnen. En̄ ghi selt uwe herte oetmoedighen en̄ nederen, met groter reverencien, vore die hoghe moghentheit Gods, en̄ vore die voete ons Heren Jhesu Christi. En̄ aldus seldi u oefenen, en̄ hier ave maken ene hebbelicheit en̄ een abijt³, daer ghi in wonen en̄ wandelen selt alle uwe leeſdaghe.

Ende in yeghewelken daghe, des morghens alse ghi op staet, soe valt neder op uwe knien, en̄ bidt oetmoedelic onsen Here dat ghi in dien daghe uwen dienst alsoe volbringhen moecht, dat hem si eerlic, en̄ u salichlic, en̄ alle den convente rastelic en̄ vredelic. Hebdijs stade van uwen dienste⁴, en̄ oirlof van uwen prelate, soe seldi horen Misse.