V. Van ghehoirsamheden ende van oetmoede

Die prophete David sprect aldus: ‘Dochter, hore en̄ sie, en̄ neyghe dine ore, en̄ verghete dijn volc ende dat huys dijns vader; want de coninc heeft dine scoenheit begheert¹.’ En̄ hier om biddic u, lieve Suster, hoert Gode en̄ uwe prelate, ende siet en̄ merct wat si u ghebieden; en̄ neycht uwe oren tote alre ghehoirsamheit: en̄ dan sal die coninc, dat is Christus, uwe scoenheit begheren.

Des morghens alse ghi Misse ghehoirt hebt, soe gaet in uwe labour². Eest oec alsoe dat ghi alsoe³ onledich moet sijn⁴, dat ghi en ghene Misse hoeren en moecht noch oec ten Sacramente gaen, hier omme en sijt niet tonvreden; want God heeft liever ghehoirsamheit dan sacrificie⁵: en̄ die vrucht ghelatens willen is altoes meerre en̄ edelre dan die vrucht eyghens willen. Ende hier omme ane grijpt altoes den versmaedsten nedersten dienst, eest inde cokene ofte int siechuys. Niemene en seldi heten noch ghebieden, het en si dat ghi boven hem gheset sijt; maer altoes doet selve gherne dat ghi vermoecht⁶. Beveelt men u oec den nedersten dienst, soe sijt blide, en̄ dankes⁷ Gode dat ghi daer toe doecht⁸. Beveelt men u oec die siec ofte cranc sijn, soe dient hem blide, saechte ende oetmoedich, en̄ sonder mur- meracie. Eest oec dat si pijnlic en̄ onghedoechsam sijn, peinst dat ghi Christo dient, en̄ toent uwe aenschijn soe saechtmoedich ende soe goedertieren, dat si hem scamen moghen vore Gode en̄ vore u. Ende soe si armer en̄ sieker sijn en̄ min vrienden hebben, soe ghi hem eer dienen selt. Ende en siet niet allene ane den ghenen dien ghi dient, maer noch meer Gode, daer ghi omme dient. Hoedt u met groten erenste, dat ghi de sieke niet en bedroeft noch en bedruct met uwen woerde, noch met werken, noch met ghelate; maer alse ghise vint bedroeft ofte onverduldich, dan seldise troesten met den doghene ons Heren en̄ met den doghene der heylighen, hoe si blidelijc ghedoecht hebben. En̄ daer omme sijn si nu glorioes ende salich in dat ewighe leven. En̄ alse die sieke enich dinc begheren dies hem noet is, des seldi hem ghehulpen soe ghi ierst moecht. Begheren si oec dat hem niet goet en ware, daer si ave versieken⁹ souden: eest dat ghi dat ontsiet, soe seldi u ghelaten ochte ghijs niet en verstont ofte niet en horet. Eest dan dat sijt emmer¹⁰ hebben willen, soe seldi hen¹¹ segghen dat hen deren soude. En̄ willen si dan niet aflaten, soe werct met rade¹² van uwen oversten, ofte metten ghenen die vroeder sijn dan ghi. Al dat ghi hen gereidt¹³ in spisen ofte in dranke, dat doet alsoe reynlic, en̄ dat maect alsoe smakelijc ofte ghi cont, dat hem ghenoeghe, en̄ ghi vrede behout in beyden siden. Ghi selt hen hare bedde vermaken, en̄ al dat ghemac doen dat ghi moecht, na dat si teder sijn¹⁴ en̄ sijs behoeven. Ghi selt bi hem bliven en̄ waken, hebben sijs noot. Ghi selt bi hem alsoe blide sijn, en̄ alsoe speellic en̄ vermakelic van woerden, dat yeghewelc sieke uus beghere. Goede woerde en̄ goede exempele van onsen Here en̄ van sinen heylighen, seldi hem segghen, eest dat sijt horen willen, alsoe dat si alle geestelic ghespijst werden ane der sielen, daer ghi yeghenwoirdich sijt¹⁵.