XII. Vanden derden slote

Hier na volcht onse derde slot, dat altoes open en̄ bereet is alle menschen te onfane, dies begheren; want dit slot en is anders niet dan gracie ende liefde ons Heren Jhesu Christi. En̄ dit slot en mach men niet vercrighen noch besitten, dan met gheheelre wederliefden. En̄ hier omme moeten wi scoren alle bande, en̄ doerbreken alle stricke, en̄ overliden alle dinc¹, en̄ verdriven commer, sorghe en̄ onlede van her- ten², en̄ alle ongheordende liefde. Ende alsoe ontcleden wi ons, en̄ doen ute den ouden mensce met sinen werken, en̄ doen ane den nuwen, dat is Jhesus Christus. Hi cledet ons mit hem selven en̄ met sinen levene, met sijnre gracien en̄ met sijnre liefden. En̄ alse hi ons aldus ghecleet heeft in sijn abijt met loste en̄ met liefden³, soe leven wi in hem en̄ hi in ons. En̄ dit is onse derde slot, daer onse begheerte mede gheciert is in hare alre hoechste⁴. Want dat ghebot ons Heren leert ons dat wi minnen selen uut al onser herten, uut al onser sielen en̄ ute al onser begheerliker cracht⁵. En̄ alse lief met lieve verenicht in een slot der liefden, daer is die liefde volbracht.