XVI. Vanden sevenden slote

Hier na volcht dat sevende slot, dat onhoecht¹ alle slote, ende dat is boven alle werke ene ghestilde raste in ledicheiden, en̄, boven al heilich leven en̄ oefeninghe van doechden, eenvoldighe salicheit, en̄ boven hongher en̄ dorst, minne en̄ lost te Gode, ewighe satheit². Binnen ‧vj‧ daghe maecte onse Here hemel en̄ erde, inghele en̄ menschen, en̄ ordinierde en̄ cierde alle dinc; en̄ op den ‧vij‧ dach raste hi van allen. Ses daghe selen wi werken; den sevenden dach moeten wi rasten en̄ vieren. Die seste tijt van beghinne der werelt die is nu³. Hebben wi dan wel ghewracht alse wi sterven, so beghint de tijt ewigher rasten.