Capitulum 21

Objectio de facilitate abstinentiæ hujus.

GERMANUS: Hoc verbum de esu duorum paximaciorum nos gratanter accipientes, respondemus hanc mensuram non posse pro abstinentia reputari, præsertim quum non possemus quotidie tantum panem comedere.

Responsio de virtute et modo ex parte continentiæ.

RESPONDET Moyses: Si vultis experiri vim hujus statuti, jugiter hanc mensuram tenete, nullum sumentes pulmentum aut aliam coctionem dominica die aut sabbato, neque per aliquam advenientium Fratrum occasionem: quoniam caro his refecta non solum poterit contentari minori panum quantitate diebus sequentibus, verum etiam refectionem sine labore differre, utpote confortata adjectione ciborum illorum extraordinarie acceptorum. Quod nullo modo facere prævalebit, qui solis duobus paximaciis semper contentus est. Recolo namque seniores quosdam hanc parsimoniam observasse cum tanto labore ac difficultate, imo cum tanta vi atque inedia hanc custodisse mensuram, ut eam sibi imponerent quasi invite nec sine gemitu ac mœrore: quod et vos reor sæpe perpessos.