Capitulum 14

Objectio, quod nec infidelium neque Sanctorum personis conveniat quod ait: Non quod volo facio bonum.

GERMANUS: Verba hæc arbitramur non convenire personis eorum qui capitalibus criminibus implicantur, neque perfectis qui ad mensuram Apostoli profecerunt; sed his qui cupientes a carnalibus vitiis abstinere post Dei gratiam eis infusam et veritatis notitiam, pertrahuntur ad inolitam concupiscentiam passionum, antiqua consuetudine adhuc violentissime dominante in membris eorum tanquam lege quodammodo naturali. Consuetudo namque atque frequentia delinquendi efficitur quasi lex naturalis, quæ insita membris humanæ fragilitatis, rapit ad vitia captivos affectus animæ nondum eruditæ studiis plenis virtutum, sed adhuc rudis ac teneræ seu debilis castitatis; ac lege antiqua subjiciens eos morti, addicit ipsi jugo dominantis peccati, non sinens eos adipisci bonum puritatis quod diligunt, sed magis compellens eos exercere malum quod exsecrantur.