Capitulum 11

Ex quo vitio procedat nocturna illusio.

NOCTURNA namque quiete monstratur qualibus distractionibus cogitationum negligentius evagemur in die. Idcirco, quum intervenerit aliqua talis illusio, non culpa somni credenda est, sed negligentia temporis præcedentis, et manifestatio morbi seu passionis intus latentis : quem non peperit primitus hora noctis, sed latens morbus per somni refectionem produxit ad superficiem cutis humorem reconditum intimis animæ fibris, arguens et propalans occultas concupiscentiarum seu æstuum febres quas tota die contraximus, pravis cogitationibus pasti. Quemadmodum corporum infirmitates solent contrahi seu hauriri, non tunc quando videntur oriri et apparere, sed per negligentiam præteriti temporis sunt acquisitæ, quando cibis sibi contrariis quis refectus, contraxit humores sibimet noxios ac letales.