Capitulum 11

De hoc quod dicit: Qui non vult operari, non manducet.

NON jam utitur ad eos consilio medici vel doctoris, sed districtione judiciariæ potestatis in eos invehitur, atque apostolica auctoritate resumpta, profert sententiam quasi de tribunali in contemptores. Illa utique potestate resumpta quam asseruit sibi datam a Domino, scribens cum imprecatione seu interminatione Corinthiis, quum illos in delicto positos admoneret ut ante suum adventum festinarent corrigere semetipsos: Rogo vos, inquiens, ne præsens compellar audere in quosdam potestate illa quæ data est mihi in vobis; et iterum, Si voluero gloriari de potestate quam dedit mihi Dominus in ædificationem, et non in destructionem vestram, non erubescam. Illa, inquam, potestate pronuntiat, Si quis non vult operari, nec manducet: non materiali gladio eos adjudicans, sed auctoritate Spiritus Sancti prohibens eis substantiam vitæ: ut si forte non formidantes pœnam damnationis futuræ, velint adhuc exsistere contumaces otiositatis amore, cogerentur salutaria præcepta suscipere saltem constricti naturali necessitate, ac mortis præsentis formidine.