Capitulum 22

Verba abbatis Moysis de remedio acediæ.

QUUM in eremo habitare cœpissem, et dixissem abbati Moysi sanctorum omnium summo, Ecce hesterno die gravissime fui afflictus morbo acediæ, nec potui liberari ab ea nisi ad abbatem Paulum protinus cucurrissem; ipse respondit: Non te liberasti ab ea, sed potius præbuisti te ei deditum ac subjectum. Adversarius namque deinceps te gravius impugnabit tanquam desertorem atque fugitivum, quem de conflictu seu tentatione superatum vidit protinus aufugisse : nisi de cetero didiceris, inito prælio, contra hujusmodi tentationem triumphare; non cellæ egressione, aut somni torpore studueris ad horam evaporare, sed tolerantia et conflictu vincere, ingruentes acediæ æstus. Unde experimento probatum est, impugnationem acediæ non fugiendo declinandam, sed resistendo, orando, psallendo, meditando laborandoque superandam.