Articulus 73

EXPOSITIO INITII CAPITULI HUJUS QUINTIDECIMI, SCILICET DE QUO AGENDUM SIT IN HOC ULTIMO CAPITULO.

DECLARATIS invisibilibus proprietatibus ordinum angelicorum, descendit Theologus ad brevem elucidationem visibilium specierum et materialium formationum ac rerum quæ ipsis in Scripturis attribuuntur. Et ita prosequitur hic quod supra incepit, videlicet qualiter Theologia, id est Scriptura, spiritibus illis supernis imagines varias corporeas, interdum etiam viles et prima facie indecentes, interdum nobiliores, adscribit.

Fer age. Istæ sunt duæ dictiones adverbiales exhortativæ, et idem significant. Sicque exhortationem ingeminat, ut vel se animet ad prosequendum quod restat, quum jam pene usque ad finem per-venerit libri, vel Timotheum hortetur ad considerandum attente quod sequitur. Sic et nos aliquando dicimus: Jam nunc videamus, etc. Itaque, Fer age quod restat, id est, eia eia, prosequamur « quod restat », supple, dicendum de ista materia, remittentes nostrum (si videtur) intellectualem oculum circa sublimes contemplationes angelorum vigore : id est, relaxantes, « si videtur » sic expedire, « vigore », id est a conatu et acumine, « oculum nostrum intellectualem », id est mentis intelligentiam seu rationis indaginem ac discursum, quo fuit intentus et laborans, « circa sublimes contemplationes », id est puras et simplices intuitiones vel considerationes speculativas, « angelorum »; ad dividuam et multipartitam latitudinem multiformis angelicarum specificationum varietatis, id est, ad considerandum « latitudinem », id est multiplicitatem diffusam, « dividuam », id est per diversa divisam, « et multipartitam varietatis multiformis angelicarum specificationum »: hoc est, remittentes et descendere facientes oculum nostrum interiorem a sublimibus speculationibus proprietatum spiritualium angelorum, ad considerandum qualiter ipsi angeli in Scripturis notificantur nobis per diversas et varias figuras, formas et species sensibilium rerum. Interdum enim describuntur apparuisse in effigie humana, interdum in forma leonis, quandoque in curruum et equorum similitudinibus. Descendentes iterum in ipsis tanquam inconsequentibus, id est in consideratione formarum istarum materialium, quæ prima fronte inconsequentes, id est impertinentes et inconvenientes videntur ad designandum immateriales nobilissimasque substantias supernorum spirituum, in simplicitatem cœlestium animorum analytice reflexis, id est, reductis, revocatis ac repetitis « analytice », id est resolutorie, « in simplicitatem animorum cœlestium », id est ad considerandum ex eis proprietates mentium angelicarum: quod est ex illis rursum ascendere ad intelligibilium speculationem, quia ex sensibilium notitia, ad invisibilium agnitionem ascendimus.

B

C