Skip to the text
Ember
PT

Articulus 75

QUAS FORMAS SEU FIGURAS ANGELIS SCRIPTURA ADSCRIBAT; ET PRIMO CUR IN FORMA IGNEA POTISSIME DESCRIBANTUR.

HIS prætermissis aggreditur tractatum, loquendo de sensibilibus formis, figuris et speciebus, quæ in Scripturis angelis adscribuntur, et cur. Inchoandum autem ratione, id est, rationabiliter incipiendum est hic, et quærendum in prima formarum discretione, id est in præcipua ista distinctione sensibilium similitudinum quæ in Scripturis angelis adscribuntur, ob quam causam Theologia fere ultra omnes invenitur honorans ignitam sacram descriptionem, id est, cur Scriptura magis frequentat « descriptionem », id est formationem symbolicam, in qua ignis memoratur et nominatur :1234 in qua descriptione describuntur et nobis notificantur angeli sancti.

Invenies autem eam non solum rotas igneas conformantem, id est, Scripturam reperies non tantum recitantem rotas igneas ad designandum spiritualia ac divina : juxta illud Danielis, Rotæ ejus ignis accensus ;5 sed et animalia ignita : juxta illud, Ecce currus igneus et equi ignei, etc.6 ; et viros quasi ignem fulgurantes, id est similitudinem virorum hujusmodi. Ezechiel enim ait : Vidi quasi speciem electri ; et similitudo quatuor animalium, et scintillæ quasi adspectus æris candentis. Hæc erat visio discurrens in medio animalium, splendor ignis, et de igne fulgur egrediens.7 Et circa ipsas cœlestes essentias cumulos carbonum8 ignis circumponentem, id est virum lineis indutum, accipientem de prunis altaris juxta alios sex viros :9 per quos cœlestes essentiæ, id est angeli, exprimebantur, sicut superius habitum est, pleniusque expositum ex auctoritatibus Ezechielis.10 Et flumina immensurabili sonitu, igne flagrantia. Unde Daniel : Fluvius (ait) igneus rapidusque egrediebatur a facie ejus.1112 Cujus sonus impetuosissimus fuit atque celerrimus. Unde alia littera habet, Irretentibili.

Sed et Thronos ait igneos esse. Sic et Daniel iterum :13 Thronus (inquit) ejus flammæ ignis. Porro in Scripturis aliquando ponitur plurale pro singulari, et econtra. Et ipsos excellentissimos Seraphim, cœlitus ardentes ex cognominatione significare :14 id est, invenies Scripturam « significare » summos illos spiritus primi chori qui Seraphim appellantur, « ardentes cœlitus », id est spiritualiter in Dei amore, « ex cognominatione », id est ex propria illorum appellatione. Seraphim quippe ardentes interpretantur. Et ignis proprietatem et operationem ipsis attribuit, id est, Scriptura adscribit « ipsis » Seraphim « proprietatem » et actus « ignis » :15 attamen, per alium modum. Sunt enim subtiles, clari ac splendidi, activi, inflammativi et sursum tendentes, ut ignis. Et omnino sursum deorsumque ignitam honorat selectim formarum facturam : id est, Scriptura celebrius introducit « facturam », id est compositionem, « ignitam formarum », id est sensibilium similitudinum, in quibus est nominatio ignis « selectim »16, id est segregatim :17 et hoc, « sursum deorsumque », id est circa angelos superiores et inferiores. Nam et angelus qui labia Isaiæ purgavit, Seraphim nominatur :18 qui juxta præhabita præcedenti capitulo, fuit de infima hierarchia. Et Psalmista fatetur : Qui facit angelos suos spiritus, et ministros suos ignem urentem.1920

Deinde expositionem horum orditur.

Ergo igneum significare censeo, id est, igneam formationem seu similitudinem judico designare, cœlestium animorum deiformissimum, id est, id quod divinissimum est in angelis, et per quod Deo potissime assimilantur : quod est ferventissimus ac purissimus amor Dei, præsertim quum et ipsemet Deus in Scripturis vocetur ignis. Nam subditur :21 Ipsi enim sancti theologi, id est auctores Scripturæ, superessentialem et informem scientiam, id est increatam sapientiam Dei, « informem », id est nudam et simplicem, nec ulla forma superaddita limitatam, in igne sæpe describunt, id est, designant per appellationem proprietatemque ignis, dicendo quod omnia nuda, certa et clara sunt oculis Dei ;222324 tanquam habente multas divinæ (si fas est dicere) proprietatis, quantum in visibilibus, imagines : hoc est, « in igne tanquam » in re « habente imagines multas proprietatis divinæ », id est varias similitudines cum natura et proprietatibus Dei, quantum licitum est dicere, hoc est, quantum in rebus visibilibus ac inanimatis similitudines tales cum Deo possunt relucere.25

Footnotes

  1. alias deest providere; provide eas; false coadunavit ↩

  2. Osee vii, 9. ↩

  3. Agg. i, 7. ↩

  4. Hebr. ii, 1. ↩

  5. Dan. vii, 9. ↩

  6. IV Reg. ii, 11. ↩

  7. * sentio ↩

  8. Ezech. 1, 27, 5, 7, 13. ↩

  9. Ezech. x, 2, 6, 7. ↩

  10. art. XLVIII. ↩

  11. Dan. vii, 10. ↩

  12. Dan. vii, 10. ↩

  13. Ibid. 9. ↩

  14. * excelsissimos ↩

  15. * distribuit ↩

  16. Ezech. i, 27, 5, 7, 13. ↩

  17. * honorificat ↩

  18. Is. vi, 6, 7. ↩

  19. Hebr. 1, 7. ↩

  20. Ps. ciii, 4; ↩

  21. Deut. iv, 24; ↩

  22. Hebr. iv, 13. ↩

  23. * essentiam ↩

  24. Hebr. xii, 29. ↩

  25. IV Reg. ii, 11. ↩

Chapter 94 of 142