Capitulum 2

De iis qui dicunt iram non esse nocivam seu culpabilem, si delinquentibus irascamur, eo quod et Deus dicatur irasci.¹

AUDIVIMUS quosdam volentes hunc perniciosissimum animæ morbum, videlicet iram, taliter excusare, ut eum detestabiliore Scripturarum interpretatione extenuare seu alleviare optarent : dicentes non esse nocivum, si fratribus peccantibus irascamur, quum et Deus dicatur furere ac irasci contra eos qui eum cognoscere nolunt, vel eum cognoscentes contemnunt : ut ibi, Et iratus est furore Dominus populo suo;² et quum orat Propheta, Domine, ne in furore tuo arguas me, neque in ira tua corripias me :³ non intelligentes quod dum volunt hominibus dare occasionem pestiferi vitii, admisceant majestati divinæ ac fonti totius puritatis turbulentiam passionis carnalis.