Articulus 8

De signis et mirificentiis gloriosissimi Pauli apostoli.

THEOLOGUS. — Paulus noster, vas electionis divinæ, primo dirissimus exstitit persecutor Ecclesiæ.¹² Quumque ad persequendum Christianos proficisceretur Damascum, in via, comitantibus eum cernentibus, a Christo prostratus est, cœlestique luce circumdatus; et Christo sibi apparente atque loquente conversus est. Hinc, ad tertium cœlum raptus est, et arcana conspexit, imo et Deum per essentiam, Augustino testante, intuitus est.³

Hic tanta miracula in Christi potestate effecit, ut portarentur super languidos ejus sudaria, et curabantur.⁴ Dum contracto dixisset, Sta supra pedes tuos, ille protinus se erexit.⁵⁶ A venenosissima vipera manu tactus, viperam in ignem excussit, et illæsus permansit.⁷ Eutychum magna ruina exstinctum suscitavit. Proclum quoque imperatoris Neronis olim pincernam defunctum, ad vitam reduxit. Decollatus, lac emanavit; caputque ejus abscisum, Jesus Christus intonuit; atque post mortem, non solum divino Dionysio et religiosæ mulieri Lemobiæ, sed et Cæsari Neroni apparuit.

Quum viros duodecim baptizasset, descendit in eos Spiritus Sanctus, et loquebantur variis linguis.⁸ Ter naufragium passus, a Christo eripitur.⁹ Ad increpationem ipsius, Elymas magus cæcitate percussus dignoscitur.¹⁰ Cum Sila incarceratus, dum in ipsa nocte Christum collaudat, fundamenta carceris mota sunt, refulsitque lumen mirificum in carceris imo, atque ergastuli aperta sunt ostia.¹¹ Christus ei frequenter apparuit, et de ineffabilibus periculis itemque tormentis eum eripuit.

PHILOSOPHUS. — Raptum illum visionemque divinæ essentiæ, plus omnibus miror.

THEOLOGUS. — Vir sapiens es, ideoque quæ veraciter mirabiliora sunt, vehementius admiraris. O Philosophe, de laude atque præconiis hujus inæstimabilis viri quid dicam vix video. Verumtamen de laudibus ejus Joannes Chrysostomus librum edidit vere decorum. Quidquid interea nobis de hierarchiis cœlestibus, de ipsa etiam superjucundissima prorsusque superessentialissima Trinitate Dionysius scripsit, de Pauli fontibus hausit.

PHILOSOPHUS. — Mira audio.

THEOLOGUS. — Opera ejus in angulo facta non sunt. Denique senatus Romanus non mediocriter de eo sensit. Senecæ Platonico Neronis magistro familiarissimus fuit, maximamque partem palatii et militum ejus, non sine summis prodigiis, ad Jesum Deum ac Dominum nostrum universorum utique creatorem convertit.

Footnotes

1. Ibid. 1 et seq. ↩

2. Act. IX, 15. ↩

3. II Cor. XII, 2-4. ↩

4. Act. XIX, 11. ↩

5. Act. XIV, 7-9. ↩

6. Act. XXVIII, 3, 5. ↩

7. Act. XX 9, 10. ↩

8. Act. XIX, 5-7. ↩

9. II Cor. XI, 25. ↩

10. Act. XIII 8-11. ↩

11. Act. XVI, 23-26. ↩