Articulus 9

De magnificentiis Joannis evangelistæ atque theologi.

THEOLOGUS. — Joannes prædilectus Jesu Christi discipulus, virgo purus, Christiferæ virginis custos idoneus, totius Asiæ fundavit atque rexit Ecclesias. In dolium ferventissimi olei Romæ missus, exivit illæsus. Hic quatuor mortuos suscitavit; margaritas confractas oratione reintegravit; virgas et lapides in optimum aurum convertit, demumque ad pristinam naturam reduxit; templum Dianæ Jovis filiæ, orando prorsus destruxit. Venenum horribile, absque nocumento virtute crucis Christi potavit: de quo quum alii duo bibissent, subito interierunt: quos tamen Apostolus suscitavit. In sepulcro semetipsum sanus locavit, et immenso eum ambiente lumine, obdormivit in Christo; moxque et insuper de ejus monumento velut manna effluxit.