Articulus 15

De sacratissimo atque amantissimo Christi athleta deiformi Areopagita magno Dionysio.

THEOLOGUS. — Nunc, o Philosophe, audi de eo de quo libenter (ut arbitror) audies.

PHILOSOPHUS. — Quid sibi vult titulus iste, et admonitio tam jucunda ?

THEOLOGUS. — De summo philosopho ac præclaro architheologo profari intendo.

PHILOSOPHUS. — Hoc certe avide audire dispono.

THEOLOGUS. — Dionysius iste, quem amo, de quo tibi nunc loquar, Atheniensium philosophorum altissimus exstitit, et ob naturalis eminentiam sapientiæ, Theosophus, id est Deum sapiens, a paganis philosophis cognominatus est. Hic, Christo in cruce pendente, in Ægypto exsistens, ecliiste, et admonitio tam jucunda ? psim solis quæ in die passionis Christi accidit, vidit, et supernaturalem agnovit. Præterea, a Paulo apostolo ad fidem convertitur cum uxore atque universa familia, et in Athenis a Paulo episcopus ordinatur. Dionysius ergo urbem hanc maximamque regionis partem ad Christum convertit.

Huic beatissimo, Paulus secreta quæ homini revelare non licuit, pandit. Unde de superbeatissima Trinitate in libro de Divinis caracteribus, de Divinis nominibus, de Mystica theologia, de Hierarchia angelica, tam profundissime scripsit, ut potius cum Paulo videatur raptus fuisse, quam ab eo hæc didicisse. Scripsit præterea et alia multa.

Denique audiens magistrum suum Paulum Romæ captum, illuc advenit. Cui post sacram necem mox Paulus apparuit. Postmodum a Papa Clemente Parisios mittitur. Ubi quum plurimos ad Christum convertisset, a præfecto capitur, irridetur, colaphizatur, conspuitur, atque durissimis loris ligatur. Hinc vero flagellatur, super cratem suppositis flammis extenditur, sed a Christo confortatur. Inde ad esurientes ferocissimas bestias mittitur; sed eo crucem opponente, mansuetissimæ efficiuntur. Præterea, in clibanum missus, illæsus egreditur. Cruci affixus, diu pro Christo, sed libenter, affligitur. Quum autem in carcere esset reclusus, Christus ei apparuit, sacramque ei communionem donans: Accipe (inquit) hoc, care meus, quia merces tua mecum est magna nimis.

Porro decollatus, caput suum abscisum erexit, atque propriis manibus per duo milliaria ad locum in quo nunc sepultus est, tulit. Illico autem angelorum dulcissimæ melodiæ auditæ sunt.

PHILOSOPHUS. — O beatissimum virum !

THEOLOGUS. — Nosti quod brevitati jam studeo: ideo alia ejus mirabilia prætermitto. Hoc tamen adjicio, quod quum Michael imperator Græcorum, regi Francorum Ludovico, Magni Caroli filio, libros Dionysii transmisisset, decem et novem infirmi in ecclesia ejus Parisiis a variis morbis curati sunt.

PHILOSOPHUS. — In hoc Deus sublimis et sanctus doctrinam ejus mirabiliter approbavit ac stabilivit.