Caput XX. Quomodo ex tertiae personae consoliditate in illa Trinitate agitur, ut concordialis et consocialis amor ubique nusquam singularis inveniatur.

Attende nunc quomodo tertiae personae copula concordialem affectum ubique comparat, et consocialem amorem per omnes et in omnibus confoederat. Si unam aliquam ex tribus personis attendis, videbis quia caeterae eam concorditer amant. Si aliam respicias, et ibi aeque invenies quoniam reliquae in ejus amore pari voto concordant. Si tertiam ab his in considerationem adducis, procul dubio caeterarum affectum pari concordia in illam confluere videbis. Si concordia attenditur, ibi amoris funiculus triplicatur, ut ubi de defectu amoris suspicio facilius oriri poterat, majori consideratione certitudo consolidetur. Ecce quomodo ex tertiae personae consoliditate in illa Trinitate agitur, ut concordialis charitas, et consocialis amor ubique nusquam singularis inveniatur. Ecce in Trinitatis assertione tanta, tam rara veritatis attestatio undique occurrit, ut mente captus videatur cui tanta certificatio satisfacere non possit.