Capitulum 20

Interrogatio de apostatis angelis, qui dicuntur in Genesi cum filiabus hominum concubuisse connubiis.

GERMANUS: Quoniam allegatio libri Genesis, Deo sic ordinante, in medium est prolata, quæ nos opportune admonuit ut nunc apte sciscitemur quod semper discere cupiebamus: quid de illis apostatis angelis sentiendum sit, optamus cognoscere, qui se miscuisse dicuntur cum filiabus hominum, utrum hoc possit secundum litteram convenire spirituali naturæ. Similiter desideramus audire quod ex Evangelio de diabolo allegasti: Quia mendax est et pater ejus;¹ quisnam intelligendus sit pater ejus.