Capitulum 22

Objectio, qualiter profana commixtio cum filiabus hominum potuerit imputari generi Seth, ante legis prohibitionem.

GERMANUS: Merito potuisset illis adscribi crimen transgressionis ex præsumptione illius conjugii, si data eis fuisset lex ista aut præceptum hoc prohibens; sed quum nondum fuisset injuncta aut jussa separatio talium personarum a conjugio contrahendo, qualiter permixtio illa potuit imputari ad culpam? Lex namque solet damnare futura peccata, non præterita ante ejus institutionem admissa.