Capitulum 21
Solutio primæ quæstionis.
SERENUS: Duas quæstiones non mediocres proposuistis, ad quas pro viribus respondebo. Et primo ad primam. Nequaquam credendum est spirituales naturas posse cum feminis coire carnaliter. Et si hoc aliquando ad litteram fieri potuisset, quare etiam modo non sæpe contingeret ut cerneremus aliquos de conceptu dæmonum ex mulieribus nasci absque semine et coitu viri? præsertim quum constet dæmones admodum delectari sorde libidinum, quas procul dubio mallent exercere per se ipsos quam per homines, si id esset possibile, quum Ecclesiastes pronuntiet: Quid est quod fuit?1 ipsum quod futurum est; et quid est quod factum est? ipsum quod fiet; et non est aliquod novum sub sole, et cetera. Sed quæstio vestra sic solvitur. Occiso Abel justo, natus est Seth loco illius, qui successit non solum personæ fratris exstincti, sed etiam justitiæ et pietati ejusdem, ne ceterum omne hominum genus haberet exordium a fratricida ac impio Cain. Porro posteritas Seth sequens patris sui justitiam, permansit semper divisa a societate et conjunctione posteritatis ex Cain sacrilego descendentis, quemadmodum genealogiæ descriptio pandit evidenter, dicendo:2 Adam genuit Seth, Seth genuit Enos, Enos genuit Cainan, Cainan genuit Malaleel, Malaleel genuit Jared, Jared genuit Enoch, Enoch genuit Mathusalem, Mathusalem genuit Lamech, Lamech genuit Noe. Genealogia vero Cain sic divisa describitur: Cain genuit Enoch, Enoch genuit Irad, Irad genuit Maviael, Maviael genuit Mathusael, Mathusael genuit Lamech, Lamech genuit Jabel et Jubal.3 Posteritas itaque nata ex Seth sibi mutuo sociata ac matrimonialiter juncta, permansit longa ætate in patrum suorum ac atavi sanctitate, nequaquam infecta sacrilegio aut malitia nequissimæ prolis seu sobolis Cain, quæ impietatis germen retinebat insitum sibi traditione et imitatione antiqua. Unde quamdiu duravit inter posteritates Seth et Cain ista discretio, posteritas Seth propter suam sanctitatem optimamque radicem vocata est angeli Dei, sive, ut alia translatio habet, filii Dei ; posteri autem Cain filii hominum nuncupantur, propter suam impietatem ac patrum suorum, et propter opera sua terrena.
Quum itaque esset inter illos tamdiu ista utilis ac sancta divisio, videntes post hæc filii Seth, qui erant filii Dei, filias hominum (eorum videlicet qui erant nati de Cain), inflammati ipsi filii Dei desiderio pulchritudinis filiarum illarum, acceperunt eas uxores;4 quæ infundentes maritis suis patrum suorum nequitias, protinus averterunt eos ab illa quasi ingenita simplicitate ac sanctitate paterna. Ad quod satis congrue pertinet illud :5 Ego dixi, Dii estis, et filii Excelsi omnes; vos autem sicut homines moriemini, etc. Qui et exciderunt ab illa vera naturalis philosophiæ scientia sibi a suis majoribus tradita, quam primus homo, qui post universarum naturarum institutionem mox conditus est, potuit evidenter attingere, et posteris suis certa ratione conferre atque relinquere : quippe qui viderat infantiam seu inceptionem mundi adhuc teneram, rudem et quodammodo palpitantem. In quo etiam fuit non solum tanta sapientiæ plenitudo, sed etiam gratia prophetiæ ex divina inspiratione transfusa, ut recens adhuc inhabitator mundi imponeret universis animalibus nomina;6 nec solum discerneret et distincte cognosceret omnia genera bestiarum atque serpentium, et virus ac furores eorum, sed virtutes quoque herbarum ac arborum naturasque lapidum, et vicissitudines temporum nondum expertorum divideret, ita quod potuit efficaciter dicere : Dominus dedit mihi eorum quæ sunt scientiam veram, ut sciam dispositiones orbis terrarum et virtutes elementorum, initium et consummationem ac medietatem temporum, vicissitudinum immutationes, et cetera.7 Hanc ergo scientiam omnium naturarum suscipiens posteritas Seth traditione paterna per generationum successionem, quamdiu mansit divisa a sacrilega Cain progenie, ita exercuit et convertit scientiam tantam ad Dei cultum et vitæ communis utilitatem, sicut eam sancte acceperat. Porro quum impiæ posteritati Cain fuisset admixta, instinctu dæmonum derivavit ac vertit ea quæ pie didicerat, ad res noxias ac profanas, et ex scientia illa audacter instituit curiosas maleficiorum artes, præstigia ac magicas superstitiones, docens posteros suos ut sacro veri Dei cultu relicto, venerarentur ac colerent elementa sive aerios dæmones.
Præterea breviter perstringendum existimo, qualiter jam præfata curiosarum rerum notitia non perierit in diluvio, licet hoc non postulet vestræ quæstionis solutio, quia narratio ista præbet nobis occasionem id perstringendi. Itaque quantum antiquæ dicunt historiæ, Cham filius Noe, imbutus superstitionibus istis et sacrilegis profanisque artibus, sciens se non posse secum in arcam portare aliquem librum talium artium memorialem, quia cum justo patre ac sanctis fratribus fuit intraturus in arcam, sculpsit hujusmodi artes in diversis metallis durissimisque lapidibus quæ corrumpi non poterant inundatione aquarum. Peracto quoque diluvio, illa omnia requisivit eadem curiositate qua ea absconderat, et ita transmisit ad posteros seminarium perennis nequitiæ. Hoc itaque modo veraciter factum est quod vulgi opinio credit factum ab angelis, putans videlicet quod angeli mali tradiderint hominibus artes prædictas.
Denique de illis filiis Seth admixtis filiabus hominum, procreati sunt filii nequiores, qui fuerunt robustissimi venatores, violentissimi ac truculentissimi viri, qui et gigantes vocati sunt propter corporum suorum enormem staturam, aut propter crudelitatis et malitiæ suæ excessum.8 Hi primo cœperunt finitimos suos depopulari, et exercere rapinas, magis viventes ex prædis quam contenti sudore et opere manuali: quorum scelera excreverunt in tantum, quod mundus expiari et purgari non potuit nisi diluvio. Quumque filii Seth ex instigatione suæ libidinis transgressi fuissent illud mandatum quod fuit diutissime ab ipso exordio mundi instinctu naturali servatum, oportuit postmodum illud renovari per legem scriptam, in qua continetur: Filiam tuam non dabis filio ejus uxorem, nec de filiabus eorum accipies filio tuo, quia seducent corda vestra ut recedatis a Deo vestro, ac sequamini deos earum et serviatis eis.9
Footnotes
Chapter 183 of 499